"Сүбедей" аттыг спортчу Ордуга республикавыста ай санында эртип турар айның хүрежин Тес-Хем кожууннуң шаңналдары дээш Тес-Хем кожуун демнии-биле бедик деңнелге эрттирген.

 Декабрь 7-де , "Сүбедей" аттыг спортчу Ордуга республикавыста ай санында эртип турар айның хүрежин Тес-Хем кожууннуң шаңналдары дээш Тес-Хем кожуун демнии-биле бедик деңнелге эрттирген. Хүрешти көрүп келген чонувуска изиг сүттүг шайны кудуп, амданныг боорзактарны үлеп хүндүлээннери, чараш оюнувусту "Өлчей"аттыг кожуунувустуң аныяк хөгжүмчүлери аян киирип ыры-хөгжүм-биле эгезинден төнчүзүнге чедир үдээннери маргылдааны онзагай байырлыг шинчиже киирген.

Тес-Хем кожууннуң Баштыңы-Төлээлекчилер Хуралының даргазы Чодураа Донгак, Тес-Хем кожууннуң Чагыргазының даргазы Чингис Тогаачы келген көрүкчү чонувуска, аарыкчыларга, мөгелеривиске чылыг-чымчак сөстер-биле чедиишкинниг хүрежирин күзеп, Хүрешти ажыттылар.

Хүреживистиң хүндүлүг чалаттырган аалчылары - Тыва Республиканың тыва хүреш Федерациязының даргазы - Анатолий Дамба-Хуурак, Тыва Республиканың күш-ажыл болгаш хөгжүлде яамызының сайыды Эдуард Сандан, кожуунувустуң хоочуну Кара-оол Лапчаа, кожуунувустуң мурнуку чылдарда Чагыргазының даргазы болуп ажылдаан Толбан Самдан, чаңгыс чер-чурттуувус Юлия Хирбээниң "Урянхай" аттыг мода бажыңының чараш уруглары тиилээн могелерге шанналдарны тывыскан.

Улуг мөгелер аразында маргылдаага Тыва Республиканың Хартыга мөгези Начын-Мерген Ооржак шүүлген, начын мөге Кежик Ооржак үжүүрлешкен. Үшкү черге Тыва Республиканың Начын мөгези Артыш Монгуш төлептиг болган.

85 кг чедир Мөгелерниң хүрежинге:
1-ги черни Салчак Хемчик-оол (Бай-Тайга)
2-ги черни Монгуш Артыш (Чаа-Хөл)
3-кү черни Чамзы Чимит (Тес-Хем)
4-кү черни Ондар Аржаан (Сүт-Хөл)

Дараазында чаа чылда январь айда болуп эрттер хурешти Эрзин кожуунга дамчып чоруур кубокту, хүндүткелдиң чеми ужаны Тес-Хем кожууннуң Чагыргазының даргазы Чингис Тогаачы Эрзин кожууннуң төлээлеринге хүлээткен.